Dedico Ai Caduti In Guerra

Prefazione

Che per la Patria
" Vivi non sono più nè sono Morti".

Di chista speci 'i società muderna,
ccà su' ditti cosi assai tinti:
nun li scuvai o lustru di lanterna
e sunu virità, non cosi finti.
'Stu munnu va avanti malamenti
ca l' omini hannu ancora di sarvaggia;!
si dicinu civli, m' o' prisenti
la vera civiltà è 'n gran miraggiu

Giustizia DIvina

Stanotti, ju m fici 'na risata,
piccatu ca successi ni lu suonnu,
ddoppu 'na bedda longa caminata,
mi su' truvatu unni pochi 'u ponnu.

Eru nno Paradisu; chi dilizzia,
e ccu gran miravigghia ju ìmmiravu
lu gran splinnuri, tutta 'dda litizzia,
priàtu, pirchì armenu lu sugnavu!

Mentri ccu l' animu assai biàtu
ju, a San Petru Francu cci parravu,
si 'ntisi un tuppiàri arrabbiatu
e ' ntra di mia subbitu 'sclamavu:

Ma cu' sarà 'stu gran maladucatu
ca tuppulia cca, 'sta manera?
San Petru, 'n facci 'n pocu 'ntrubbulutu
rapi 'u spurtellu a vidiri cu' era.

Dissi: << Chi voi, cca ccu priprutenza
bussi no' Regnu di lu gran Diu? >>
E chiddu : << Sugnu 'n omu di cridenza
e stari 'n Paradisu è lu disìu >>.

San Petru cci rapiu lu purtuni
e cci rispusi : << Trasi; ti prisentu
o re di l' Universu, lu patruni,
c' appruvità... si resta 'i tia cuntentu >>.

A lu Signuri, San Petru umilmenti
dissi : << Maestru, si prisenta chistu
ppi stari ìn Paradisu 'n pirmanenti
pirch' iddu, dici, c' ha amatu a Cristu >>.

E lu Signuri : << 'nterruga 'a cuscenza;
ti cridi propiu dignu di 'stu donu? >>
E chiddu : << Si, gran Diu di climenza,
pirch' aju statu sempri 'n omu bonu.

Su' dimucristianu, e lu partitu
l' ahju sirvutu ccu gran fidiltà... >>,
e lu Signuri, isannu lentu 'u jtu:
<< Basta! Canusciu 'a to attività! >>

Tu, ni la terra eri un pezzu grossu,
ma cca è 'n' atra cosa; 'nfatti, guarda,
su' uguali 'u pigmeu e lu colossu,
'n cunta 'ccillenza, partitu e cuccarda.

Li dimucristiani, tradituri
su' di la Santa Cruci!... Tu macari;
tu, comu l' atri ha' statu 'n sfruttaturi
ppi l' ambizioni... e ppi li dinari.

E duminannu ccu l' ipocrisia,
ccu priputenza, ccu li 'mbrogghi e 'ntrighi,
biffannu libbirtà, dimucrazzia,
'lludevi bravi genti, grossi e nichi.

Intantu, a lu discepulu guardannu,
dissi: << Oh, Petru >>, 'ntonu assai paternu,
<< di stari cca è 'ndignu, r ti cumannu,
'mmidiatamenti... caccialu a lu 'nfernu! >>.

La Racina e lu Vinu

Un jornu la racina, già matura,
dissi a lu vinu beddu 'mbuttigghiatu:
"'ccussì, ccu 'ss'etichetta fai fiùra
sciatuzzu beddu, figghiu miu aduratu"!

Lu vinu, assai surprisu, cci rispusi:
" dicisti figghiu tò... e chi ni saì?!"
E la racina: " Oh, 'ngratu, ca mi usi
'n parrari ca nun l'haju 'ntisu mai!

Ma comu",la racina addulurata
'nsistìu suspirannu: " 'u pò niàri
ca si sanguzzu miu?". A 'sta parrata
lu vinu, afflittu, suspirau macari.

" Ma tu ti sbgghi!... Oh mammuzza cara",
rispusi, " dicu mamma ppi 'n si diri...
la rialtà, ch'è veramenti amara,
tu, rassignata, 'a divi 'n pò sintiri:

La nòmina haju d'essiri tò figghiu,
ma rialmenti, 'n sacciu 'i cu' pruvegnu;
sulu nni l'apparenza cci 'ssimigghiu
a lu to figgiu veru, e ni cunvegnu.

Sai, a 'stu munnu tanti nuccinteddi
sunu jttati a' rota, appena nati,
o 'nda 'na chiesa, intra a fagutteddi;...
poi, cci dannu 'i nomi e li casati.

'Ccussì, criscennu, passannu pp'i tali
ma 'n sunu affattu chiddi, in rialtà;
aviri 'i nomi farsi chi ni vali?
Ju, passu ppi to fighiu,... 'n virità!...

In virità, iu su' sinceru a dillu,
sugnu un gran bastardu, e mi ni dolu;
haju 'n bon nomu, tichetta e sigillu,...
ccu 'st'apparenza a l'omu lu cunsolu.

Ma tu chi cridi, semu sulamenti
tanti omini e ju ch' 'i nomi farsi?
Ah, sapissi... ccu l'aggiurnamenti
d' 'a scienza, quantu cosi su' scumparsi!

Mintemu: oggi è rara 'a lana pura;
la fannu ccu la scuma di lu latti;
l'omu, cc' 'a so custanza e ccu bravura,
tanti 'i ddi cosi li fa cuntrafatti.

Fa cosi ccu lu vitru, e cangia 'u nomu;
matura frutti artificialmenti,
e tanti cosi 'i fa 'n si sapi comu!...
'N frunti a li farsità, ha' dittu nenti!

E lu beddu ovu, cu' pò prividìri
ni l'avviniri comu lu farannu?
Senza addini!... e cci po' cridiri,
ca si va avanti sempri nni l'ingannu!

Li cosi onesti e veri ginuìni
ormai su' picca, tuttu è farsità,
e certi, 'nginuamenti... 'di mischini,
dicinu ch'è "prugressu e civiltà"!

Dissi 'a racina: "Ju restu stralunata!"
E 'u vinu: "Ppi finiri dicu chista:
cu' dici 'u veru... facci 'na risata,

Lu Calciu

Lu calciu avissi a essiri 'nu sportu,
ma 'n rialtà è propriu n'affarismu;
è 'n gran cummerciu, spissu anchi stortu...
l'omu, va a l'asta ppi lu fanatismu!

Cu' chiù disponi, di li società,
s'accatta li chiù megghiu jucaturi,
perciò, in fini, è chista 'a virità,
ccu li palanchi vìncinu sicuri.

Li jucaturi, anch'iddi tutti tifu,
volunu 'a vincita ad ogni costu,
nno jocu, 'n cunsiguenza, fannu schifu:
cu' chiù cu' menu joca assai scumpostu.

Spaddati, scurrittizzi, e pidatuni
nè jammi 'i l'avvirsari su friquenti,
e 'n fini di partita resta immuni
sulu quarcunu... oh, cosa divirtenti!

'N parramu po' di l'arbitru, pirchì,
si voli, vidi e frisca di continu
diversamenti, è propriu paccussì,
fa finta 'i nun vidìri, l'assassinu!

Si scrivi: dui e dui... fannu trì
havi raggiunti iddu... chi sturtizzi!
E tuttu chistu è loggicu 'u pirchì:
sempri ppi favuriri... chi bassizzi!

Perciò succedi, spissu, 'a riazzioni
de' jucaturi e pubblicu frimenti:
'ngiuri, pitrati, umiliazzioni,
'nvasioni 'i campu d' 'i chiù priputenti!

Pirchì nun c'è ppi iddu quarchi 'nchiesta
ppi sapiri s'ha' tortu o ha' raggiuni?
Ora, s'ha'tortu, sparti duna 'n testa
a cu'ha'raggiuni... fattu assai cumuni!

Perciò, com'oggi l'hannu cumminatu,
nno calciu 'u veru sportu è proprio mortu,
'ntantu, di tifu ognunu è malatu
e secuta a chiamllu 'n granni sportu!

Lu veru sportu è cavalliria,
è currittizza e ginirusità...
m'anchi nno calciu avemu l'anarchia:
cc'è tuttu, tranni sportu e civiltà.

Cungedu

L' omu è trattatu propriu senza lodi;
d' 'a società, ca fa 'stu munnu tristu,
(nna vita sulu lu 'mbrugghiuni godi),
ni dicu mali, pirchì 'u munnu è chistu

Ni 'stu mudestu libbru l' arma afflitta
pinseri onesti e sani vi traduci;
passu pp' 'un visiunariu? è na scunfitta!...

Ma mi cunsolu: ccu palori duci
anchi Gesù ni desi a strata ritta,
'n cumpensu... fu 'nchiuvatu e morsi 'n Cruci!

Prugessu e Civiltà

I

Li suonni, quarchi vota su' curiusi !
Stannotti supra 'n munti, gruossi cani
'bbaiannumi assai furiusi,
di bottu addivintaru tutti nani

Eranu tanti e tutti armati forti
di fàuci, d'accetti e di vastuni ;
ju mi sintia prorpiu 'n manu a morti,
quannu, fujemmu, fici un ruzzuluni.

Ruzzuliai pp''a scisa di lu munti ;
li nani mi spireu tutti quanti ;
ruzzuliannu sbattia 'n tutt'i punti
raccumannannu l'arma e' megghiu santi

Ma a trattinirmi nuddu mi spuntava !
Quannu fui juntu, 'nfini, a la bassura,
sciatari 'n potti, 'u cori parpitava,
pirchì si spalancava la chianura.

E 'ntra n'abbissu paccussì cascai
e rutuliannu sempri sprufunnavu ;
a 'n massu, dispiratu, m'affirai,
cidìu, e a ruzzuliari sicutavu.

L'abissu, scuru e tantu sprufunnatu
a picca a picca sempri si stringìa,,
e ju, sbattennu all'unu e l'autru latu
pinsavu a 'n veru locu di maggìa.

'Nfini, mi fracassai tuccannu funnu ;
tempu ebbi di pinsari, sulamenti,
ca davu 'addiu a tuttu lu mè munnu
e chiù ppi mia 'n'esistiva nenti !

II  

Ni 'ddu mumentu, tuttu fracassatu,
riduttu a 'n'ammassu, tutalmenti,
mi 'ntisi di na manu sullivatu
e riturnari tisu nuvamenti.

Guardannu, vitti addritta, 'arreri a mia ;
'n'omu, ccu 'na varbazza janca e longa,
trimannu tuttu paru cci dicìa
di riputarmifora 'i 'dda spirlonga.

Iddu : << Nun ti scantari >>, prestu dissi,
<< comu ti trovi 'ntra 'sta speci 'i 'nfernu?
Comu arrivasti intra ni 'st'abissi? >>
'N sonnu pinsai : 'stu suonnu duna 'n ternu!

Ma a lu sò dittu ju, priànnu forti,
lestu rispusi : << Portimi luntanu,
'ccussì mi sarvi di 'na lenta morti >>...
circannu d'affirrallu ppi 'na manu.

<< Va beni >>, arrispunnìu, << nna 'n mumentu
a lu to' munnu presto ti riportu
e rividrai lu to' firmamentu ;
stringiti forti a lu me' corpu mortu ! >>

Ju m'affirai a iddu, a lu so' dittu,
ma chiù stringìa e chiù nenti affirrava,
e mi sintìa, criditi, veru afflittu,
mentri iddu autu mi traspurtava.

E paccussì, 'nda 'n nenti fui salvatu,
e nun sapennu comu ringrazzìari
mi stetti a li so piedi addinucchiatu
'N mentri, parrava l'unna di lu mari,

ca propriu nna 'na spiaggia ni pusammu ;
l'acqua, unniàva 'n pocu, liggirmenti,
e mentri nui nni l'occhi ni guardammu
l'unna ja e vinìa di friquenti.

III

<< Ora >>, mi dissi chiddu, << ha' a turnari,
perciò ti lassu ccu lu to distinu >> ;
<< Pirchì >>, ju cci rispusi, << 'n poi ristari?
'Sta vita nostra varia di cuntinu.

Quant'avi ca tu manchi da 'stu munnu? >>
Mi rispunnìu : << Cu' è ca 'u po sapìri?!
'Ncirca, ppi diri 'n tempu paru e tunnu
un tricent'anni >>; e fici gran suspiri !

<< Ah, trecent'anni?! Su' miravigghiatu ;
m'allura nun canusci nenti affattu
di comu 'u munnu d'oggi è cumminatu !
Fermati cca >> ...<< Ma tu si propriu mattu ! >>,

rispusi. E ju : << Vulannu tunnu tunnu,
'nda 'n nenti visitamu 'u globbu sanu,
'n manera ca turnammu all'atru munnu
raccunti all'atri cosi ca nun sanu >>.

E mentri ju parravu, a nui distanti
ì'mpruvvisu si sintiu 'n rumuri 'n motu
e iddu si vutau sull'istanti
'sclamannu : << Chi succedi un tirrimotu? >>

<< Ca quali >> ,arrspunnivi, <<chiddu è 'n trennu>> ,
(e 'ntantu mi vutai ppi vìdìri)
infatti a mè parola 'n vinni menu :
'n direttu già filava a nun si diri.

Cci dissi: << guarda, tu lu stà vidennu?
è 'n trenu, porta genti, n'è vacanti>>;
iddu, guardannu 'u trenu ca currennu
sparìa, feci 'a cruci sull'istanti.

<< Vidisti ch'era beddu 'lluminatu?
m' 'u lustru , ora, è diversamenti,
non comu è tempi to' , ma è cumminatu
'ntra 'npalluncinu 'i vitru, assai splinnenti.

Ma caru amicu, chiddu trenu è nenti;
a mari 'n ci su' chiu' navi antiquati,
ti dicu, pirchè tu lu teni 'n menti,
cci sunnu gran vapuri e curazzati.

E tutti li vapuri, chi ti cridi
si sentunu isulati nni lu mari?
Ccu li strumenti ognunu sapi e vidi
unni si trova e d'unni hà a caminari.

Ti dicu sulu 'i cosi chiù ricenti
pirchè a dilli tutti, 'n si pò fari;
mintemu, cc'è 'a radiu riciventi,
tilivisuri: ognunu pò guardari,
e anchi sintiri, cosi assai luntanu;
cinimatogrifi ogni quattu passi;
l'autu,sunu a purtata 'i manu,
e tanti,tanti cosi ppi li spassi.

E mi scurdavu , pò di l'ariuplanu:
cc'è a muturi e a riazzioni,
cc'è l'elicottiru, ca vola pianu,
satelliti già junti a pirfizzioni.

Ma c'è 'na cosa, ch'eni la chiù bella:
l'omu camina 'n celu, cc'u so versu,
cc'u tempu, siddu Diu 'un si ribella,
l'omu cunquista, 'n parti, l'Universu>>

IV  

Lu vecchiu, ca ristava annichilutu,
ccu l'occhi spalancati mi guardava;
'nfini si scossi, chiù nun stesi mutu
e tistiannu lentu mi parrava.

<< Ma chistu è veramenti 'n'autru munnu,
assai l'umanità ha caminatu,
chiddu ch'è ciattu l'omu lu fa tunnu,
a giudicari 'i quantu ha sprimintatu !

Ora campati propiu assai cuntenti
ccu 'ssi dilizzi c'hai muntuatu,
mentri c'a disiàri 'n resta nenti
a lotti e guerri nuddu c'è purtatu>>.

<< A no!>> Lu 'ntirrumpii pristamenti,
<< li guerri cci sù sempri, amicu caru!
Poc'anni arreri tutti 'i cuntinenti
ficiru guerra e 'u munnu 'u scuncassaru!

Pirchì, n'è comu l'epuchi passati
ccu sciabbuli e fucili sgangarati,
ora cci sù cannuni esagerati...
senza parrari di li carri armati!

Li curazzati 'n ferru sù muntati,
hannu cannuni grossi, assai pricisi
ccu tanti bon cungegni cungignati;
sparannu, pò, fracassunu paìsi!

Poi, cc'è un vapurettu nicu nici,
sfilatu e chiusu ca va sutta mari,
cc''u cannucchiali spia lu nnimicu,
etta siluri,e tornisi a 'ffunnari!

E l'ariuplani? A squatri e a unnati
sganciunu bummi 'n granni quantità,
fracassunu anchi centri pupulati,
'mmazzannu genti senza mai pietà!

La bumma atomica, ppi mala sorti,
scoppia e distrudi 'n nenti tutti cosi,
e prestu avemu <<'u raggiu di la morti>>!...
'Stu munnu, 'n veru, 'n havi sulu rosi!

Sù l'urtimi truvati di la scienza;
la civiltà fa passi da gigantu...>>
<<No!>>,'ntirrumpiu 'u vecchiu, <<ppi cuscenza,
'sti to palori farsi sù bastanti!

Sì lu prugressu, ccu li bummi e razzi
ha caminatu assai, ha statu forti,
ma diri civiltà cosa è di pazzi
pirchè ora aviti chiù ruìni e morti!

Prugressu sì; ma quannu l'invinzioni
fussuiru sulamenti ppi lu beni
di tutti quanti li pupulazzioni,
fuss'anchi civiltà; ma, dannu peni,
e gran disastri a l'umanità,
mentri la scienza fa lu sò prugressu
putemu diri,ppi la virità,
pp'a' civiltà, nun è un gran successu!

Poviru munnu! Sta gran civiltà
tinitavilla cara, mentri piaci...;
scappu a lu 'nfernu... pirchì armenu ddà
pozzu gudiri 'n pocu chuì di paci...>>.

V  

E cca spirìu! Sulu, abbarruàti,
trimannu nni 'ddu locu un'era misu,
m' arrisbiggiai tuttu trasudatu,
pinsannu li raggiunamentu 'ntisu.

E riflittennu... ma, 'n sustanza, 'u mortu,
ccu 'ddi palori ca mi dissi ddà
avìa raggiuni, 'un si pò dalli totu
pirchì mi dissi a santa verità.